Die 11 närrischen Paragraphen

Leev Lückscher he em Saal opjepass !
De Manni määt de Prinz - un  mir  han  Spaß.

Manni maach doch dä Prinz - han se em beim Fiere gesaat.
Om Heimwäch hät hä dann jründlich - im Bushüssje - üvverlaat.

Bes em  Schloofzemmo hat hä et dann en de Reih,
ich weede Prinz Karneval  un  Monika: „Do bes met dobei !“

Se hät dä Kääl verdutzt beluurt,
un och lang un  anständich beduurt !

Dann hät se sech dat Spillcher üvverlaat,
„Ävver ich kumme nit ze koot“ hät se gesaat.

Dröm ston se he de herrliche Zwei,
met all us Jecke  en ene Reih !

De Prinz Manni un sing Prinzessin Monika,
se schwenke nun Zepter un Kron -  es dat nit wunderbar ?

Mir welle fiere, höppe, danze, laache -
um Öckerather Land luuter jecke Saache maache !

Mer fiere ächte Dörper Karneval,
em Säalche, em Zelt, op de Strooß - einfach üverall !

Kölle hät singe staatse Dom und dä Rhing,
ävver wo mer sin - do es Sunnesching !

Vun all de Öckerother Jecke -
bruch sich keine un nirgends ze verstecke !

Domet dat och alles funktioniert,
han mer se - Prinz Manni und Prinzessin Monika - hück feierlich proklameet.

Jede Jeck mööt wesse wat hä maache soll,
dröm schrieve mer  flück elf Paragrafe voll:

 

Paragraph 1:

„Däm Prinzepaar singe Wäch“

De irschte Bürger vun Hennef - dat es de Klaus Pipke he - hätt met singe Manne doför ze sorje, dat am Enjangk und Usjangk  vum köngliche Dörpche „Summerschhoff“ ahn de beede Ortsschilder de Zosatz  „Prinzedörp“ – joot, dat heisch - met finge Edelstahlschrüvje  anjebraach weed.

Ußerdämm hät hä doför ze sorje, dat de Prinzessin Monika un de Prinz Manni wohlbehalten un standesjemäß zwesche  Summerschhoff  un  Öckeröth - un och widder öm - kutschiert weede künne !

Doför hätt hä de janze Schluchte un de „Mure“   -   dat sin Jeröll-Lawine  -   lenks un räächs vun de Strooß ens richtich un dauerhaft ze beseitije.  Wääjen dem janze nüdije Material  - däät hä et bess - de Raiba widder in Öckeroth ansedele.

De Prinzestrooß  es och vun de eijensinnije Blechkutscheaffsteller  - do bei däm Schpochtplaz - frei ze hale. Wann nüüdisch hätt hä doför - de Stadtsoldate – öm Hölp  – ze roofe.

Däm ärme Schpochtverein hätt hä och ne jruuße staatse Parkplaz ze baue – andere krije jo och en janz  Stadion !

Domit hä dat all latze kann, wääd hä anjewiese, die zick dissem Johr sprudelnde Jrundstüür doför enzosetze. Dä Rest ahn Jrundstüür is vun Hennef ahn de Öckerother Jecke  affzojenn  - domet he anständich Karneval jefiert weede kann ! 

 

Paragraph 2:

„Däm Prinzepaar  sing Sitzung“

All Jecke sin opjeroofe, sech en Käätche för de Karnevalssitzunge he um Land ze koofe un ahn däm Daach ens de janze Sorje - de me esu hätt – beim Fiere ens  jraadt  ze verjesse !

Trotz bestem Bühneprojramm hann de Horst Schlemmer – alias Günter R. us Öckeroth,  et Helene  Fischer – alias Elisabeth H. us de Nümm, et Andrea Berg – alias Heiner K. us  Leechteberch un et Rita Schrubbke – alias Michaela Sch. vum Ühleberg sich en et Sitzungsjeschehen zumindest durch ühr Kumme un durch diverse Zwischeroofe enzobränge.

Ne besundere  Projrammpunk  weed de jemeinsame Ufftritt vun de Prinzenmacher - däm Vorstand vum Remm Flemm un de Kleine KG - die all ens esu jään im Mittelpunkt ston welle, sich ävver  nit  richtich traue. Wat  se dann ze maache han, domet weed et Prinzepaar  se noch üvverrasche.

Wenn nüüdisch, weed de Paus  vun  de Sitzung jestriche - oder de Sitzung hingen eruss verlängert. 

 

Paragraph 3:

„Däm Prinzepaar  sing Hüngerchen“

De Landmetzgerei Strack weed zum königliche Burg- und Hoflieferanten för de Fleesch- un Wooschversorjung vum Prinzepaar bestellt. Dä joode Noober - dä Andreas - un dä Kameraad -  dä Herbert - sin bis et widerroofe weed -  befugt, dä Titel „Jecke königliche Landwooschfabrikante“ ze führe. 

Wääje „dieser besonderen Ehre“ sin se uffgefordert, flöck en besundere un standesgemäße Wooschspezialität ze kreiere, un och ze  verkoofe.  Se muss esu lecker wie us Prinzessin Monika un  esu  schön wie use Prinz Manni sin. Se muss de Hunger stille, de Manneskraft stärke un de nüüdische Schärfe han  –  och  wann mer  use  würzige Senf jo  fast immer dobei  han ! 

Besser noch schmack dat Wöösche met enem anständije Brütche. Doher weed  dä meisterliche Bäkersmann, Johannes Drecker, hemet  anjewiese, in singe Backstuff en dozo passende Deisch ze üvverläje -  un em Backes dat schöne Brütche ze verkoofe.  Us Ehrendame Manuela weed  nur  aff  un  zo in et „Cafekränzche“ entsandt, öm dat janze Spillche ze üvverwaache. 

 

Paragraph 4:

„Däm Prinzepaar  singe janz besundere Wunsch“

Däm Kinderprinzepaar  es et op alle Karnevalssitzunge ze gestatte, de leev enstudierte Auftritte och vürdraage ze dürfe. Se sulle och ens all dat saage dürfe,  wat se de Jrooße  un  us  Jecke   –  esu  ze  saage  han.

Wat  wöör  dä  Karneval - doch ohne de Pänz.  All  Jecke  sulle  Spass  ahn  dä  Freud un  däm  Laache  han  wat de Pänz met in de Karneval bränge.

Leev  Kinderprinzepaar , leev Pänz   –   et Prinzepaar  un sing janze Mannschaft freut sich -  op  en  tolle Karnevalszick  met  üch  zesamme !

 

Paragraph 5:

„Däm Prinzepaar  sing  Kölsche Mess“

All Jecke sin opgeroofe, met däm Prinzepaar  zesamme noch ens en schön „Kölsche Mess“ he en de Öckerother Kirch ze fiere. Mer wulle de Herrjott bitte, us  joot durch de Karnevalszick  ze bränge.

En Absolution vüür all dat  -  wat mer ahn Karneval esu  drieve künnt  -  weed et do wohl nitt jävve !  Ävver mer wulle ahn Karneval och christliche Werte, wie Nächstenliebe, Barmherzigkeit und Gerechtigkeit nitt us de Auche verliere !  Ens zesamme stonn;  dä Nevvenan in de Ärm ze nemme;  ens däm ene uss ze jävve, dä et sich nit leiste kann;  ens ene Heim ze bränge;  un do ze hellefe, wo et nüüdisch es - jo dat  jehüürt och in de Karneval !

Träckt mit us zesamme - un de Bloskapell  vürre ahn - un em passende Kostüm in de Öckerother Kirch - en, wo mer de Karneval och ens  jet  anders fiere weede -  bevüür de Faastezick  endjültisch  kütt !

 

Paragraph 6:

„Däm Prinzepaar  sing  Strüssje“

Dä  Summerschhoffer  Fraue sin opjeroofe -  schüne  Strüssje ze binge, domet et Prinzepaar  emmer en bunte Jrooß an et jecke Volk richte kann. De Mannslück vum Land sind opjeroofe, Ihr Fraue ze ungerstütze, su wie se dat jo och jede Daach - un emmer - maache.

Mer jläuve, dat weed janz doll klappe - denn he um Land künne  mer noch de Maue huh krempelle  un  düchdich  anpacke ! 

 

Paragraph 7:

„Däm Prinzepaar  singe Rusemondachszoch“

All Jecke sin opjeroofe, sich ahn Rusemondach in allerlei bunte Kostüme ahn de Strooß ze stelle. Sökt Pappnaas, Ringelhemb un Lappekostüm  –  de Haupsaach is et weed bunt !

Packt de Ante-Jeck, de Immi, de Oma, de Opa un de Möpp -  un stellt üch ahn de jeschmückte Strooß !  Packt üch en de Ärm, hürt kölsche Leeder, schunkelt met   un   seid  leev zueinander - fiert Strooßekarneval !

De Daach doför  mööt Ihr all Kessele leddich esse – na wägen däm Wedder – un satt und jood jelaunt noh däm Ühleberg träcke ! He kannste noch ächte Dörper Karneval han. Schunkelt un fiert euch wärm, domet ihr ahn Rusemondach en Öckeroth alles jevve künnt !

All, die jeck jenooch sin,  - weede hemet opgefordert - em Zoch metzomaache. De Zoch darf och länger weede. Un wann mer dann all met jonn  un  keine mieh ahn däm  Strooßerand steiht, jo dann schmieße mer us de Kamelle halt selver zo.

 

Paragraph 8:

„Däm Prinzepaar  sing Prinzeburg“

 Disse Session steiht de Prinzenburg selbstverständlich om Dörp - in Summerschhoff -jo do, wo et Prinzepaar  esu  jän doheim es.

De Käjelevereine „All op ees“ un „Einer steht immer“ sin opjeroofe de Burg  jet  ze schmücke un herzorichte, domet jeder weiß wo der es  - un nit versehentlich do langs  lööf  oder  jück! Bröder und Schwestern - morjen noh de Fröhmeß jeiht et loss !

Vörm  Rusemondachszoch sin all  leev  Jecke  enjelaade  - sich op de Prinzenburg noch ens bei Kölsch un Ätzezupp  ze stärke.  Dä meint -  hä wör nitt leev -  jo dä sull besser doheim blieve !

De Jonge vun de Feuerwehr weede sicherlich - met enem ruude Auto - en Prinzenburg-Taxi enrichte,  domet die Jecke, die nit fahre künne oder die fooßkrank sin -  sich op de Prinzeburg och stärke künne.  Jood - dat mer de Jonge vun dä Feuerwehr han !

Feuerwehrjonge – emmer kumme!    Feuerwehrmädcher – och!

De Paragrafe weede erweitert!

 

Paragraph 8a:

De Bloskapell  Öckeroth – namentlich de Schilds Pitter - weed hiermit beauftragt, de Feuerwehr ze besöke  un de Kamerade beim nächste Übungsdienst em „rhythmischen Rufen eines Schlachtrufes“ ze ungerreechte!

Dä kennt sich nämlich us - in dä Ausbildung rhythmischer Wildsäu - wie use Prinz Manni bereits selvs erfahre moot!

 

Paragraph 9:

„Däm Prinzepaar  singe Karneval“

Dat Motto vum letzte Prinzepaar  „Ob rut, blau, magenta oder grön, mir fiere zusamme und dat is schön“ – hätt och däm neue Prinzepaar  sing Motto sin künne.  Et weed  doher noch ens opjejriffe !

Bei „karnevalistische Begegnungen“ sin de Färve  ze mische ! De Fraue tuusche de Männer oder de Männer tuusche de Fraue !  Jo -  dat künnt sich durchaus luhne.    -  Rut steiht bei Blau, Majenta schunkelt mit Jrön, Blau danz mit Rut  un all Färve stusse  met  Jell an.

De Präsidente  vun  dä Karnevalsvereine han sich emmer,  wann se sich bejäne, mit dem Schlachtroof vun däm andere ze bejröße - un sich anschließend  hätzlich  ze  bütze. Wann nüüdisch, kann vüür  däm Bütze „zum Abbau von Hemmnissen“ en Kölsch enjenomme weede.

Esu hätzlich sull dä Karneval he om Land sin. Dat Zovill ahn Ernsthaftigkeit und dä Kommerz im Karneval schicke mer  op de andere Rhingsick   -   dat darf in Kölle blieve !

 

Paragraph 10:

„Däm Prinzepaar  singe Orde“

Dat Prinzepaar hätt ne schöne bunktije Orde   -    op däm sühß de  -   wo et stolz drop es. Do es jet  jemolt vun de herrliche Heimat un  vum schöne Karneval  un do es och de Schlachtroof  ze lese   –   „Jecke - vum Land !“

Et  es  en  Ehre,  su  ene  Orde  ze  kräje  un  dä es doher „voller Inbrunst und  Stolz“  ze  traage! De Orde darf nit  jekoof weede   -   un de Handel es strengstens verbodde ! De ene kritt en esu   –   dä andere muss en sich eesch  verdeene !  Jo  –  esu es et halt em Lääve !

Op de Froch  „Wo es dinge Orde?“  ze antworte  „Han ich verjesse!“  woot  bes hück schwer bestroof !  Dat Prinzepaar in singe janze  „Großzügigkeit und Güte“ weed  dat ävver nit maache:

Jede Jeck, dä singe vom Prinzepaar  verliehene  Orde  nit  dobei  hät, muss sich flöck beim Prinzepaar melde - un  kritt  ahn  däm  Daach  selbstverständlich ne „Ersatzorde“ !

 

Paragraph 11

„De Droot zum Prinzepaar“

All die, die helfe welle – Karneval metzojestalte,

die jecke Idee han,

die en kölsche Mess maache künne,

die em Zoch met jonn wulle,

die Kamelle schmieße künne,

die en bunkte Orde verdeent han,

die jet vüür de Pänz mache welle,

die en Prinzeburg mache künne,

die jläuve, Auto fahre ze künne,

sin opjeroofe, sich beim Prinzepaar ze melde. Schrievt en E-Mail ahn:    

prinzmanni@t-online.de    oder   prinzessinmonika@t-online.de

 

Esu   -    dat wor et !

Dat  es  jetz  Jesetz !

 

Dodrop roofe mer us:

 

Jecke          -          vum Land

Remm          -          Flemm

Mer hale          -          Pool

Öckerother Pänz  sin        -           Klasse

Westerwald          -           -sterne

Lott de Moot        -          nit senke

Ühle         -          Allaf

Voll          -          -blut

Feuerwehrjonge         -         emmer kumme

Feuerwehrmädcher         -          och

all andere Vereine        -         Alaaf

Jecke          -          vum Land